|
RAM HMANGAIH A HUN VE TA E
Lallianzova, Vanglaini
May 2, 2003
Mizote hi Hnamah chuan kan chiang tan viau tawhin a lang a, kan Mizo pui (kan hnampui) hnam dangin kut an thlak chuan kan rilru a nain kan Hnam chhan nan chuan kan ngam huai thin hle a nih hi maw... 'Silcharah Mizo tlangval vaiin an sawisa hlum' tih thawm kan hriat chuan kan hriat rual rualin kan rilruah kan bula vai mistiri te, vai dawrkaite an lo lang nghal uar uar thin a, a nih loh leh, a nawlpuia Silchara thawh thlak mai duhnate a lo awm thin a ni lo'm ni? Hei, kan tunlai boruakah pawh kan Mizo tlangval F.Lalfamkima Tuikuk helhovin an rukbo khan a chhan turin MZP, YMA, Political Parties leh Kohhran hrang hrangte kan inkau thup mai kha a ni a. Sorkar lamin min dangbet lo phei se chuan kan che na viau tawh mai thei a ni. Hetiang khawpa kan Hnam kan hmangaih lai hian, kan ram hi hmangaih nachang kan la hre tawk lo emaw chu aw.. a tih theih a ni.
Kan ram Mizoram, hei lo chu ramdang kan nei si lo, he kan ram neih chhun hi tha tak leh duat taka kan enkawl a ngai si a, Cachar nena kan inri-nate khu ram hmangaihtu tan chuan chinfel dan dap a hun ta hle mai.
Hei mai bakah kum tin, thal a lo thlen hun apianga kan ramngaw duhawm tak tak a kang duai duai thinte hi hmuh hrehawm ka ti thin. Hetianga kan ram a kang duai duai thin hian kan mamawh ngawih ngawih, boruak tha leh tui thianghlim hi engtiang takin tibawlhhlawhin tichhia ang maw? Hringnun tihlimtu nungchate hi engzat tak kangral thin ang maw? Hei mai a la ni hleinem, heng ram kang nasa tak avang hian kan ram leilung tha tam tak a luang ral dur dur thin tih hi kan hriat a tul ta hle mai. Kan ngaihsan em em, Israel te chuan thlaler ramro pawh theihtawp chhuaha ramngawah an siam lai hian, keini Pathian nung ringtu intite hian Lalpa min pek, ram leilung, ramngawte leh nungchate hi dimdawina tel hlek lovin kan tichereuvin kan suasam mai mai dawn em ni? Kan tihchhiat tak ni lo mahse, a chhe tur ven him leh siam that hi chu mi tinten kan mawhphurhna a ni tih kan hriata tan kan lak a tul ta takzet mai. Hetiang renga kan awm a, kan ram chhe mek hi kan thlir mai mai chuan kan Pathian hian "Malsawm tlak loh" tiin min hawisan hlauh ang e, Zoram tang fan fan.
|
 |
