|
GREEN MIZORAM CHUNGCHANG HI
Patrick Z, Chhingchhip
Kan Mizoram sorkarin Green Mizoram Programme a duang a, Zoram ti hring tura thing phun beihpui kumtina a thlak thin hi chu, a tum ram lam ngahtuah chuan a tha-in a ropui hle mai. Kan ram hmuntin han thlir hian a kum a telin a bua tulh tulh mai si a, nakin lawkah thlaler ram min la nih san mai ang tih pawh a hlauhawm hlel lo. A boruak lah ni se a kum a telin a lum tulh tulh mai bawk si nen. Tunah phei chuan kan Aizawl khawpuiah phei chuan Air Condition a lar ta hle-in, kan CM Bangla, tlang thawveng lama awm emaw tih pawh air condition tam tawk nen thuam a ni, te an ti leh ta zel a. 'Zoram chu boruak nuam tak, air condition pawh ngai ve lo' tia an lo sawi thinte chu thuthlung hlui chan a chang zo ta a nih ber mai awm hi maw.
Hetiang boruak hlauhawm a kan awm laiin kan sorkar chuan Forest Deparment kal tlangin thingphun beihpui a thlak thin a, a lawmawm ngawt mai. Kumin June thla chhovah pawh khan hmun tam takah YMA member-te, sikul naupangte leh mimal lam thleng thlengin Forest Department kui tiah sa, thing chi hrang hrang an phun leh ta hlawm a. Heng an thing phunte hi eng zat tak dam khawchhuak ang maw! Han ngaih mai chuan heng an thing phunte hi za-ah panga a dam khawchhuah chuan a lawmawm ngawtin a rinawm. Engvangmaw kan tih chuan, hetia thingtiak phunte hi enkawl zui a ngai em em a. Hmun tam takah chuan a phuntute hian an phun tawp a, a hung leh lam chu an tum lem lo. Hmun thenkhatah erawh chuan an han hung ve liam luam a, kum khat pawh a ral hmain a hungna chu a chhe leh mai a, ngaihtuah zui leh pawh awm tawh chuang lovin, thingtiak, la awm nem tak chu a hmelma khauh tak takte hmachhawn turin a mal din a lo ngai ta a, a ding khawchhuak zo ta ngang thin lo a ni. Chuvangin, thing phun kan uar a nih chuan a puitlin hma, enkawl a ngaih chhung hi chu enkawl ila, hei hi a phuntute mawh a ni tih i hre nawn theuh ang u.
A lehlam sir atanga han thlir ve leh thung chuan heng kan thing phun zo zaite hi sorkarin sum tam tak senga a lo kuitiahte a ni a. Chutah a phun turin YMA-te emaw hnenah inhlawhna angin a han pe leh zui a. Thing tiak pakhat phunah cheng engemaw zat hlawhin YMA-te chuan an han phun a. An ni YMA lahin pawisa lam thlir ranin, YMA taka ram leh hnam humhalh duhna rilrua dawn thleng pha lovin an han phun a. Ram leh hnam humhalh duhna nen chuan phun ni ta sela chu tha takin an hung ang a, a puitling ngei tur hi a ni a, mahse hungna mumal hmuh tur awm hek suh, an hung chhun lah a hungna a lo chhiat deuhva han thawm that awm bawk hek suh. Heti hrima ram leh hnam humhalh chu a luhai thlak duh hmel hle. Kan sorkarin Green Mizoram atana a sum sen ral zawng zawngte hi a hlawhtlinna, kei ni, mimawlte tan chuan hmuh tur a vang duh hle mai a, a lo thlawna inkhawhralna ni berin a ngaih theih ta mai a lawm le! Heng sum sen zozaite hi BPL chhungkaw tan, an buhfai lei nante hmang ta mai ila kan hlim tlang mai awm a sin.
Mahse .... ... in ti teh ang. Kan sorkar chuan a tihtur dik tak a tiin a lang tlat. Kan ram ngaw kan thiat darh zel a, ram a bua-in a lum tulh tulh a, nakin lawka chhiatna rapthlak thleng mai thei dan nana thing phun beihpui a siam hi chu dem tur chi a ni lo. A tih tur dik tak leh mipui leh ram hmangaihna a ni. Hetih lai hian kei ni, mipui thing phuntu, labour force-te hian sorkar ram hmangaihna au aw hi kan chhang tha lo zawk niin a lang. Kumina Forest Department-in thing phun tur a pek zo zaite kha nung ngei turin enkawl tum ila, tin, a phun mana pawisa pawl ho hnena a pek zozaite kha kan lo midum hlawh dawn chawt mai a nih chuan a fuh lo viau ang. A phun man tih lemah a enkawlna tur a ni tih hria ila, kan thing phunte kha a nun ngeia, Green Mizoram kan siam ngei theih nan leh, hei ngei hi Ram leh Hnam Humhalhna, YMA-in kum engemaw zat a zawna a lo puan, a tihhlawhtlinna kawng pakhat a ni tih hria-in, uluk taka enkawl zui i tum teh ang u.
[Vanglaini Aug 6, 2003]
|
 |
